Via serrada pliras uras - Evacuà scola pervi da smanatscha da bumba

La gievgia suentermezdi hai dà a la scola da commerzi ed economia a Cuira ina smanatscha da bumba. La polizia è stada en acziun. La scola saja vegnida evacuada ed intercurida, ha la Polizia chantunala communicau. Las 20.45 haja la polizia pudì dischavertir.

Curt suenter las 15.30 haja la Polizia chantunala survegnì per emagl in avis sin ina smanatscha d'in attentat da bumbas. La polizia haja serrà il conturn da la scola da commerzi ed economia e la scola primara Nikolai. Radund 380 persunas, cunzunt uffants, sajan vegnidas evacuadas. La Grabenstrasse è stada bloccada en omaduas direcziuns.

Plirs tozzels forzas d'intervenziun sajan stadas en acziun da la Polizia chantunala e da la Polizia da la citad. Dus chauns detecturs d'explosivs dal Grischun èn vegnids sustegnids da dus chauns da Son Gagl. Er al lieu èn stads ils pumpiers ed il salvament da Cuira. La Procura publica e la Polizia chantunala dal Grischun investigheschan en chaussa.

Gia il mars avevi dà ina smanatscha d'amoc a la scola Giacometti a Cuira. Sco la Polizia chantunala aveva communitgà avevi dà in'annunzia pervi d'ina smanatscha scritta en ina tualetta da la scola – cun il text «Amoklauf 21.03.24».

Da mezdi ha la polizia pudì confermar che la situaziun na saja betg urgenta – uschia che las lecziuns da scola han gì lieu normal il suentermezdi.