Divers studis en l'entira Svizra examineschan quantas persunas ch'han anticorpuls en il sang. In da quels sa numna «Corona Immunitas» ed examinescha tranter auter la situaziun en ils chantuns Grischun e Son Gagl. Tenor il principi da casualitad ha l'Uffizi da statistica selecziunà 600 persunas tranter 5 e 64 onns da sa participar. Mintga persuna envidada po envidar anc in'ulteriura persuna che viva en la medema chasada.
Il studi cuntegna in test d'anticorpuls en il sang e questiunaris.
Nus vulain vegnir a savair quantas persunas ch'èn gia vegnidas en contact cun il virus e quant derasà che quel è en general.
Var 20-30% da las 600 persunas envidadas en Grischun e Son Gagl hajan sa registradas enfin uss. Surtut tar ils creschids saja la prontadad gronda. Tar uffants e giuvenils pli pauc.
Nus n'avain naginas aspectativas. Nus vulain dentant chapir meglier l'andament da la pandemia, era per pudair cussegliar la politica.
Sin emprims resultats saja anc da spetgar in mument. Ils emprims participants vegnian dentant a savair las proximas emnas, co lur resultats vesian ora. Quai sajan dentant provas dal december. Uschia duria quai var quatter emnas, enfin ch'ins vegnia a savair ses agen resultat.