L'onn passà han ins vis els dapertut – ils avis da spargnar electricitad. Lura ha il chantun Grischun lantschà ina campagna cul num «L'energia è stgarsa. Na la sfarlattain betg». E las mesiras han gì effect. Uschia ha la populaziun svizra spargnà l’enviern passà 1'250 uras gigawatt. Quai è tant sco il chantun Basilea-Citad dovra en in onn. E la finala, la fin da l’enviern, han ins lura pudì constatar: Propi ina mancanza d'energia n’hai betg dà en Svizra ed en il Grischun.
Nus dastgain constatar che la situaziun è meglra. Ils deposits da gas èn plains en l’Europa. Las ovras atomaras en Frantscha èn per gronda part en funcziun e quai èn buns signals.
Situaziun da partenza pli segira che l'onn passà
La purschida d'energia è pia pli gronda che l’onn passà. Tge ch'è dentant anc intschert è l'aura. Pia sch’i vegn in enviern fraid ed ins dovra dapli energia da stgaudar. Uschia na possian ins betg dir cun tutta garanzia ch’i na dettia naginas stretgas d'energia. Tge ch'ins sappia dentant dir: quai ch'ins haja elavurà l’enviern passà na saja betg stà per nagut.
Uschia entschaiva proximamain era il stab da crisa d'energia ch'ins ha clamà en vita l’onn vargà, puspè a lavurar. El observa la situaziun e reagescha sche necessari. Ed era la Confederaziun è stada activa: Ella ha procurà per plirs implants da reserva, tranter auter da forza idraulica. Plinavant ha ella era guardà per reservas da gas e magasins per pudair arcunar quel en l'exteriur.
