En egl dat cunzunt la repartiziun dals fugitivs e las fugitivas en il chantun. La gronda part, numnadamain in quart ha chattà albiert en la Surselva. Quai n'haja dentant betg mo da far cun la repartiziun mabain cun l'iniziativa dals privats. Suenter la Surselva suanda la regiun Plessur cun 18% e lura il Partenz e Tavau cun 14%.
Scenaris per ils proxims mais
La Confederaziun quinta cun divers scenaris, co la situaziun cun las dumondas da status «S» sa sviluppescha en l'avegnir. Ins quinta che la guerra continuescha anc sur mais u schizunt onns. A curta vista quinta la Confederaziun cun 300 enfin 700 dumondas per status «S» a di. Sur in zic pli lunga vista cun 80'000 enfin 120'000 dumondas enfin la fin da settember. Il chantun Grischun quinta uschia cun 2000 enfin 3000 persunas – pia il dubel u perfin il traidubel dal stan actual. Perquai vegn appellà a las vischnancas da s'annunziar, sch'i chattan albierts che dattan suttetg ad almain 40 persunas.
Nagina integraziun per 30 uffants
En l'entir chantun èn vegnids integrads 200 uffants. Quai è ina sfida per il chantun e per las scolas – quai surtut a Mustér. La scola publica ha fin ussa prendì si 8 uffants. La fin da mars èn arrivads 30 uffants da l’Ucraina. Dus mais e mez suenter n'èn els anc adina betg integrads en la scola. Tenor Renè Epp, il president communal da Mustér, è il motiv che las classas èn gia plainas, e che la scola n'ha naginas capacitads pli. La magistra dals 30 uffants, Halyna Ponomarenko, è fugida cun els e dat ussa scola d’englais en il ressort Catrina a Mustér e scola online cun la classa da Kiew.
Dad integrar 30 uffants sper ils auters 200 scolars e scolaras è strusch pussaivel.
Collavuraziun cun chantun maina a schliaziun per l'atun
Uss vul il chantun Grischun e la vischnanca da Mustér collavurar pli fitg, uschia ch'ils uffants pon uschè spert sco pussaivel ir en la scola publica. I pudess esser ch'ils uffants vegnan en in center collectiv, ch'els restan a Mustér e van là a scola u ch'els vegnan partids si sin differentas scolas en las vischnancas. La finamira è ch'ils uffants ucranais van a partir da l’atun a scola.
