Il deputà Phillip Ruckstuhl (AdC Domat) ha vulì savair, co la tgira da Spitex per uffants en il Grischun saja organisada. La regenza ha respundì en scrit che sch'il basegn da tgira e da tractament spezialisà saja dà, vegnian uffants e giuvenils en il Grischun tgirads da la spitex d'uffants.
En il Grischun hajan tut ils servetschs da la Spitex d'uffants in tschert dumber da collavuraturas e collavuraturs permanents che stettian a disposiziun sin dumonda. La tschertga da quest persunal saja però difficila, perquai ch'i dettia en il Grischun bler main tgirunzas e tgirunzs cun l'accent da scolaziun «uffant» che tgirunzas e tgirunzs da persunas creschidas.
Trais organisaziuns da Spitex d’uffants da la Svizra pon er practicar en il chantun Grischun. La Spitex d'uffants Svizra Orientala, Horn, è activa dapi intgins onns en il chantun Grischun. Sia permissiun da manaschi è tenor la resposta da la regenza vegnida prolungada l'ultima giada il 2019 per ulteriurs 4 onns.