Il svilup ha durà onns. Ussa ha l'uffizi da patentas europeic finalmain patentà il «Snowimager» – ina camera speciala che optimescha la perscrutaziun da naiv e lavinas. Sviluppà quest apparat ha l'SLF, l'institut da prescutaziun da naiv e lavinas a Tavau.
En la cuverta da naiv cun infracotschen
Per pudair analisar la cuverta da naiv trametta il «Snowimager» radis d'infracotschen en la naiv. Duas cameras che sa chattan en l'apparat masiran quants da quests radis che returnan. A maun da questas datas po lura vegnir analisada la consistenza da la cuverta naiv. Cun questas infurmaziuns po lura vegnir creà in profil da naiv pli objectiv che fin ussa.
Per il mument mo prototips
Causa ch'i sto anc vegnir sclerì en tge champs che la camera speziala po tut vegnir duvrada, na datti betg anc products finals dal «Snowimager». Cler è però fingià ussa: l'apparat che simplifitgescha la lavur pretensiusa da las perscrutadras e dals perscrutaders da naiv e lavinas tegna ora bler ed ha era gia fatg lungs viadis.
L'onn passà ha in collega da lavur prendì l'apparat en l'Antarctica. Là ha el lavurà cun la camera cun temperaturas da -45 grads celsius.
Betg mo previsiun da Lavinas
Il «Snowimager» na simplifitgescha betg mo la previsiun da lavinas. Las analisas objectivas e prezisas davart la consistenza da la naiv da quest apparat gidan er a prevesair auazuns. En pli pussibiltescha l'apparat era d'observar co che la cuverta da naiv sa mida causa la midada dal clima.
