Anc uss na possian ins betg constatar in regress cler tar il dumber d'infecziuns, uschia ha la media chantunala Marina Jamnicki, infurmà avant las medias. La situaziun saja dentant acceptabla. Pertge ils ospitals dettian actualmain dumogn, il mument èn 56 persunas ospitalisadas en il chantun pervia da Covid-19. Sin las staziun intensivas èn 10 persunas, 9 dad ellas vegnan respiradas. Qua possia quai vegnir stretg, uschia Jamnicki. Tar las ospitalisaziuns quinta l'Uffizi chantunal da sanadad da cuntanscher il punct culminant la fin november.
Stagiun da skis e cas da corona
Far ina prognosa pertutgant ospitalisaziuns a pli lunga vista saja uss strusch pussaivel. I saja cler che la stagiun d'enviern muntia er per ils ospitals stagiun auta. Sch'i saja da quintar qua cun stretgas en ils ospitals grischuns possia nagin dir uss, uschia Marina Jamnicki. I saja dentant segir da star attent ch'i na dettia betg cumulaziuns d'accidents da sport e cas da corona.
Las cifras actualas en Svizra
Aifer las ultimas 24 uras ha l'Uffizi federal da sanadad survegnì 5'007 annunzias da novas infecziuns dal coronavirus. La media da 7 dis è uschia sin 5'001, in quart pli pauc ch'avant in emna. La rata positiva da test munta a 23,6%, vul dir da 100 tests èn bunamain 24 positivs.
Ultra da quai ha il BAG registrà 79 novs mortoris e 221 entradas en ospitals. En total annunzian ils chantuns il mument passa 3'800 persunas che vegnan tractadas en ils ospitals pervi da Covid-19.
