En Svizra sco er en Grischun han numerusas staziuns da mesiraziun nudà l'entschatta d'october temperaturas sco da stad.
Las temperaturas actualas èn fitg extraordinarias. Anc mai n'èsi stà l'october uschè chaud ed er uschè ditg chaud.
Per exempel ha il termometer mussà il glindesdi a Poschiavo 25,7 grads, tge che saja bunamain 2,5 grads sur il record da fin qua. En pli hai dà numerus records en Grischun: Da 15 staziuns da mesiraziun sparpagliadas en Grischun han 10 mesirà in record. Quai saja ina situaziun pulit extrema, di la meteorologa da SRF Meteo.
Ch'ils records vegnan ruts per 2 grads è extraordinari. Quai va be entras la midada dal clima.
8-10 grads pli chaud che en media
«Aura normala» na dettia betg, uschia Sina Lenggenhager. Cumpareglià cun la media da blers onns saja uss però bler pli chaud. Per exempel mussa il termometer en media l'entschatta october radund 16 grads, a Mustér var 13 grads. Las temperaturas da quest october sajan però 8 fin 10 grads pli autas.
Legenda:
Aara a Berna: Cun temperaturas d'aua da 18'4 grads, e passa 25 ordaifer èsi manaivel pussaivel da far bogn.
SRF
