Mardi ha la gasetta «Bild» publitgà ina glista da crediturs da l’interpresa austriaca Signa. 60,8 milliuns euros duai era la Banca Chantunala Grischuna avair dà a l’interpresa che ha stuì annunziar il november da l'onn passà insolvenza. Ma tge pudess quai muntar per la banca e tge per il chantun, sche l’import avess da constar? Intginas dumondas e respostas tar quest cas.
60,8 milliuns euros. Uschè in grond credit duai la Banca Chantunala Grischuna avair dà a l’interpresa Signa – quai tenor ina glista da crediturs che la gasetta tudestga «Bild» ha publitgà mardi passà. Sper la GKB han para er autras bancas svizras dà gronds credits a questa interpresa, tranter auter las bancas chantunalas da la Sursilvania e da Turitg u la banca da la Migros. Tschertas bancas han era gia confermà ils credits a la Signa, sco per exempel las bancas chantunalas da l’Argovia e dal Vallais u la Banca Julius Bär. La GKB na vuleva dentant betg confermar, sch’ella saja creditura da la Signa. Envers la FMR ha la GKB respundì gia mardi ch’ins veglia «avair chapientscha che nus n’ans exprimin principialmain betg tar eventualas u effectivas relaziuns da fatschenta».
Ma tge è insumma il problem da quels credits? L’interpresa Signa è vegnida en miserias finanzialas pervi dals tschains ch’èn creschids. Ella ha perquai stuì annunziar insolvenza il november 2023. Per tut ils crediturs da Signa vul quai dir che quels daners van forsa a perder dal tuttafatg. Tenor «Bild» ha la Signa en tut debits da 14 milliardas euros tar bancas, surtut en Germania ed en l’Austria.
Tge è insumma la Signa?
La Signa Holding è ina gronda interpresa d’immobiglias, da commerzi e da medias austriaca ch’è activa sin l’entir mund. Ella ha sedias en tut l’Europa: en l’Austria, en Germania, en la Svizra, en l’Italia ed en il Luxemburg. La chadaina da negozis Karstadt u il Chrysler Building a New York ha ella tranter auter cumprà, u era cumparts da las gasettas austriacas «Kronen Zeitung» e «Kurier». En Svizra ha la Signa per exempel cumprà da la Migros la mesadad da la chadaina da negozis Globus. Curt e cumpact: Igl è in conglomerat da fitg bleras fatschentas ch’è activ sur tut il globus.
Fundà la Signa ha l’onn 2000 René Benko, lura sa numnava l’interpresa anc Immofina. L’investur dad Innsbruck ha 45 onns. L’onn 2019 ha il magazin american «Forbes» prendì el per l’emprima giada en la glista da las persunas las pli ritgas dal mund. Sia facultad era lura vegnida stimada sin 5 milliardas dollars.
Tge munta ina tala sperdita per la GKB?
Sco che l'expert da bancas Max Lüscher-Marty ha ditg envers la gasetta «Südostschweiz», na fiss la GKB cun ina sperdita da stgars 61 milliuns euros insumma betg periclitada. Cun in volumen da fatschenta da 69,3 milliardas francs ed emprests a la clientella da 22,5 milliardas francs è in tal credit ina piculezza. Probabel saja dentant, tenor Lüscher-Marty, ch’il gudogn da la banca possia sa sminuir. Quel era tenor il rapport da gestiun 2022 sin ina «autezza da record» da 207,5 milliuns francs. Plinavant suppona Max Lüscher-Marty ch’in tal credit saja segirà cun immobiglias, uschia che la banca na perdess betg l’entira summa dal credit.
Cun tge fiss il chantun Grischun confruntà?
Il chantun Grischun è acziunari da maioritad da la GKB. Tenor il rapport da gestiun 2022 appartegnevan 84,5% da las aczias la fin dal 2022 al Grischun. Quel onn ha la BCG pajà 92,8 milliuns francs sco dividenda al chantun. Sche quest credit a l’interpresa Signa – sch’el è lura propi vegnì attribuì en la dimensiun da 60,8 milliuns euros – giess a perder, lura sminuiss quai il gudogn da la GKB e cunquai il pajament da dividendas al chantun sco acziunari principal.
Cunquai che la banca è dentant tut auter che periclitada da la sperdita dad in tal credit, n’ha quai betg influenza sin la garanzia chantunala. Quella garanzia va en funcziun, sche la GKB na pudess betg pli sbursar cun agens meds daners da contos da spargn, da provediment, da libra circulaziun ed era dad obligaziuns.
Er autras bancas pitschnas han dà credits
La dumonda resta, sch’in credit ad in'interpresa internaziunala sco la Signa va a prà cun las fatschentas d’ina banca chantunala e sche quai n’è betg ina memia gronda ristga. Inside Paradeplatz, ina pagina da web che s’occupa da finanzas, scriva en quest connex: «Bancas chantunalas giaudan la protecziun dal pajataglia, perquai ch’ellas èn cunresponsablas per il bainstar da quel. Correspundentamain pretenda lur mandat da prestaziun credits a l’economia locala.» Quai na vala naturalmain betg mo per la GKB, mabain era per tschellas bancas chantunalas ch'han dà credits a la Signa. Var 250 milliuns euros credits han las bancas statalas svizras dà a l’interpresa austriaca tenor la glista da «Bild». Era la gasetta austriaca «Der Standard» ha constatà mesemna che betg mo grondas bancas hajan dà blers daners a la Signa, mabain surtut era pitschens instituts locals, betg mo en Svizra – per exempel la Volksbank Mittelhessen en Germania e pitschnas bancas Raiffeisen en l’Austria Auta. E la gasetta «Der Standard» scriva vinavant ch’en bleras regiuns, nua che las pitschnas bancas èn activas, n'haja la Signa gnanc immobiglias.
Cunquai che la branscha da bancas è fitg discreta – surtut natiralmain era pervia dal secret bancar – èsi grev da giuditgar, sche da quels credits èn tar bancas chantunalas courant normal. Forsa èn ils pajataglias simplamain intervegnì da quai, perquai ch’ina interpresa è vegnida insolventa ed ina glista da crediturs probabels è vegnida publica. Da sa dumandar èsi dentant, sche da quels credits èn vairamain la fatschenta d’ina banca chantunala che duess agir localmain per la populaziun locala e che surtut era il chantun sto sustegnair cun ina garanzia statala, sch’i fa da basegn.
