En total han las partidas gì da reparter 85 sezs da cumissiun – dentant sin 120 deputadas e deputads. La repartiziun per ils proxims quatter onns han las scheffas ed ils schefs da fracziun fatg, quai tenor fermezza da las partidas.
Cura ch'il dumber total è enconuschent, cumenza aifer las fracziuns la dumonda tge deputada e tge deputà survegn in sez? Ed en tge cumissiun?
Per las fracziuns ch'èn creschidas (p.ex. PPS u PVL) è la repartiziun pli simpla che per fracziuns che han stuì laschar plimas tar las elecziuns da la primavaira (p.ex. PLD u AdC). Ils schefs da fracziun han confermà ad RTR che deputadas e deputads en uffizi hajan precedenza, prender davent ad els in mandat en ina cumissiun na saja nagin'opziun. Cler che er novizas e novizs veglian recaltgar in dals sezs – els stoppian dentant avair in zic pazienza ils emprims quatter onns. Il Cussegl grond elegia dentant adina puspè cumissiuns ad-hoc per tscherts projects e là vegnian novizas e novizs persuenter resguardads.
Dapli dunnas – dentant betg en cumissiuns
La cumpart da dunnas en il Cussegl grond è creschida sin 33% – l'ultima legislatura muntava la cumpart anc a 22%. Questa tendenza na sa mussa dentant betg tar las cumissiuns: Là munta la cumpart da dunnas actualmain a 25%, cumpareglià cun 26% avant quatter onns.
La grafica mussa la cumpart da las dunnas che han survegnì in sez en ina cumissiun. La PPS ha per exempel be 4 dunnas en la gronda fracziun da 25 – tuttas 4 han dentant recaltgà in sez en ina cumissiun.
