Enstagl da survegliar festas, open airs, gieus da ballape cun bleras aspectaturas e blers aspectaturs, èn las lavurs dals servetschs da segirtad, sco tranter auter Sprecher Security e Securitas, stadas las suandantas:
Las mesiras da la Confederaziun han gì la consequenza che quellas han era stuì vegnir controlladas. Quai è stan dad oz, radund 70% da tut noss servetschs durant la pandemia.
Concret munta quai, ch’ins ha entupà las differentas firmas da segirtad, tranter auter en ils territoris da skis, fatschentas u ustarias per controllar sche las persunas, ma era ils patruns, sa tegnian vid las mesiras.
Events da sport
Singulas giadas han els era accumpagnà events da sport. Sa chapescha senza aspectaturas u aspectaturs – tge che n'haja betg dispit fatg pli simpla la lavur, di Sandro Sprecher.
Sche nagins aspectaturs ed aspectaturas èn avant lieu, munta quai per nus bunamain dapli preschientscha. Sch'ina cursa da skis u in gieu da ballape vegn fatg senza aspectaturas ed aspectaturs, munta quai che nus stuain serrar giu da grond spazi.
In bun onn cun bler lavur
Guardà enavos sin quai onn, han las firmas da segirtad gì tuttina blera lavur sco avant la pandemia. Uschia ch’els èn cuntents cun l’onn passà. Per part, hajan els perfin duvrà dapli collavuraturas e collavuraturs, perquai che las dumondas per ils servetschs sajan savens stadas fitg spontans, di il manader da la filiala da la Securitas en la Svizra orientala, Adrian Schärer.
Betg dapli agressiuns
Schegea che las firmas da segirtad sentian che las persunas hajan plaunet avunda da las mesiras ed èn unfis da sa tegnair vid ellas, na sajan las Grischunas ed ils Grischuns betg vegnids pli agressivs encunter la Securitas u Sprecher Security, dian Adrian Schärer e Sandro Sprecher.