L’econom da manaschi Marc Kollegger è creschì si a Cazas e viva a Cuira. El lavura dapi 9 onns tar il Servetsch psichiatric dal Grischun (curt PDGR) en differentas funcziuns da cader. Il 2019 ha el surpiglià il post sco vicedirectur e dapi la stad 2024 responsabel per la direcziun operativa e CEO ad interim.
La funcziun sco CEO n’è betg insatge ester per mai. Jau hai dastgà funcziunar sco CEO ad interim dal fanadur fin ussa. Igl è tuttina auter. Per mai datti novas incumbensas.
En il rom dal process da recrutaziun èn vegnidas inoltradas dapli che 40 annunzias, tuttas èn vegnidas examinadas d’ina cumissiun cun criteris clers da selecziun, scriva ils PDGR sin sia pagina d’internet. Marc Kollegger che era gia ad interim en questa rolla è vegnì elegì sco nov CEO dals PDGR. Era el ha stuì passar quest process da recrutaziun.
Oriundamain ha Marc Kollegger fatg l’emprendissadi mercantil e suenter il studi d’econom da manaschi a Cuira. El sez n’è betg psicolog e sco el di ha el sco CEO er in’autra funcziun. Chapientscha per ils pazients e las pazientas haja el perquai tuttina. Betg mo per ils pazients e las pazientas haja el chapientscha, mabain er per ses radund 1'300 collavuraturs. I saja ina lavur che pretendia bler. Il manaschi dura 24 uras, 7 dis ad emna. Perquai sajan sias portas era adina avertas per il persunal.
Adina dapli persunas pertutgadas en il Grischun
Fatg saja numnadamain ch’i dettia adina dapli giuvenils cun malsognas psichicas e quai era en il Grischun. Tenor Marc Kollegger creschian las cifras èn il sectur dals uffants e dals giuvenils dapi corona sgarschaivlamain. Vers il schurnal regiunal da SRF di el:
Il squitsch social, il stress da mintgadi, fenomens da moda negativs en il sectur da l’internet e dal cyber, mobbing e la preschientscha cuntinuanta ch’ins sto avair. Tut quai ha tenor mai in’influenza negetiva sin nossa societad.
Ils Servetschs psichiatrics dal Grischun emprovan da sa focusar sin las malsognas ch’èn vegnidas pli preschentas ils ultims onns.
En l’avegnir vul Marc Kollegger metter paisa sin dus puncts. In é la construcziun dal nov bajetg per il tractament da uffants e giuvenils. Sper il nov bajetg sa concentreschian els sin il tractament ambulant da lur pazientas e pazients. Quella purschida na cuvria betg adina ils custs, saja dentant fitg impurtanta e relevanta per la societad.
