Actualmain datti ina scola ed ina scolina bilingua a Cuira. En la scolina van 18 uffants, en l’emprima enfin la sisavla classa hai var 80 scolars e scolaras en las classas bilinguas. Gist la purschida da las scolinas è ils ultims dus onns sa sminuida. Ina scolina è vegnida transferida sin in parcadi en in container. Dapi lura n'han intgins geniturs betg pli tramess ils uffants en questa scolina bilingua. Uschia èn els stads cnap sut il dumber ch'oblighescha da far duas classas, pia sut 20 uffants. Perquai ha la citad stritga ina scolina ed ussa datti mo anc ina. En questa vegn instruì per sursilvan. Quai pudess dar intginas malsegirezzas tar famiglias ed uffants che discurran a chasa in auter idiom. En la scolina vegn numnadamain discurrì en l'idiom. Suenter, en la scola primara sa mida quai ed i vegn discurrì Rumantsch Grischun. Questa purschida funcziuna tenor Patric Collet, il president da l’uniun rumantscha a Cuira. Ed era per la scolina na fa el betg explicitamain pretaisas a la citad, mabain a las famiglias che duessan nizzegiar questa purschida. Sche la dumonda daventa pli gronda, alura datti era motiv per engrondir la purschida. Sch'i dat dapli scolinas, alura datti era differents idioms che vegnan instruids.
Ponderaziuns dals geniturs
A l’infurmaziun da l’uniun rumantscha Cuira èn stads var diesch geniturs. La gronda part haja schon decidì, che lur uffants duain ir en la scolina bilingua. A la sairada han els anc pudì sclerir chaussas e far dumondas. Per exempel sch'ils uffants pudessan esser surdumandads cun duas linguas? U co ch'i funcziuna precis cun quest bus da scolina che duai purtar ils uffants a scola e puspè a chasa? Ed era sch'il contact cun ils uffants dal quartier sa mida, sch'els van en la scolina bilingua ch'è pli lunsch davent? Da la partida eran era geniturs dad uffants che van schon en la scolina u scola bilingua. Uschia hai dà ina discussiun e bleras infurmaziuns. La runda è adina puspè vegnida tar la conclusiun che sch'ils geniturs na fetschian betg in problem or d'insatge, alura na saja quai era betg in problem per ils uffants.
Jau discur rumantsch cun ils uffants, la mamma tudestg – quai è mintgatant grev.
