Suenter che la scola Sontga Catharina ha annunzià il cumenzament dal mais da serrar sias portas ha la regenza prendì posiziun en il rom da l'ura da dumondas en il Cussegl grond. Peter Peyer, il cusseglier guvernativ responsabel, ha declerà che la regenza deploreschia ch'i na saja betg stà pussaivel da chattar ina schliaziun per cuntinuar la purschida da la scola. Il chantun saja stà en discurs tant cun la claustra da Cazas, sco lura er cun l'organisaziun da la Svizra orientala ch'aveva mussà interess da surpigliar la purschida.
Il chantun ha fin il davos empruvà intensivamain da chattar ina schliaziun – fin uss senza success.
Ins na saja dentant betg vegnì perina cun l'organisaziun davart la purschida malgrà ch'il chantun haja fatg in pass envers l'organisaziun, uschia Peter Peyer en il Cussegl grond. Il chantun leva en sasez schlargiar la purschida, quai na leva l'organisaziun betg. Ella vuleva surpigliar la purschida actuala, questa pussaivladad haja il chantun lura purschì. Tuttina saja l'organisaziun sa retratga, uschia Peter Peyer.
Anc vid tschertgar schliaziuns
Il chantun saja uss en discussiun cun auters partenaris che porschan er curs da tudestg da chattar ina schliaziun per cuntinuar la purschida. I dettia sfidas pervi da la mancanza da persunal qualifitgà, pervi da las localitads ed er pervi dal squitsch da temp – cunquai ch'ils partenaris sa mussian fitg engaschads possian ins dentant guardar positivamain en il futur. Il chantun vegnia en scadin cas a far ses pussaivel per vinavant porscher las scolaziuns.
Frust per mungias, magistraglia e fugitivs
La Claustra dominicana ha annunzià da sa retrair sco purtadra da la scola Sontga Catharina sin la fin dal fanadur. Quai scriva la scola en ina communicaziun. Gia dapi passa in onn ha la claustra annunzià da far quel pass. In motiv saja la vegliadetgna da las soras. Uschia na sa vesan ellas betg pli ablas da manar vinavant il manaschi da la scola. La claustra sa focuseschia sin autras incumbensas, uschia la priura Brigitte Schönenberger.
Quai fa natiralmain fitg mal, cun quai che nus essan dapi 70 onns engaschads en questa scola, e nus avain fabritgà si ella, purtà ella ed era gì bleras magistras.
Durant ils ultims onns è la scola sa focusada sin curs d'integraziun per giuvenils e creschids. 130 giuvenils ed 80 creschids visitan actualmain la scola. Quels curs èn per exempel impurtants per ch'ils giuvenils pon far pli tard in giarsunadi.
Tractativas cun nov purschider han fatg naufragi
Las tractativas da la claustra, il chantun e l'organisaziun ch'avess vulì manar vinavant la scola han dentant fatg naufragi – malgrà ch'i pareva ditg sco sche tut giess bain. Ins haja dentant gì ideas memia differentas, di la manadra da la scola, Marion Bundy, envers RTR. Var 40 persunas d'instrucziun perdan cun quai lur lavur – uss, cura ch'igl è atgnamain memia tard per magistras e magisters da chattar ina nova plazza.
Tuts èn fitg malsegirs e trists. Ils fugitivs na san betg nua ch'i van a partir da l'avust en curs da tudestg. Ils magisters stattan qua e n'han propi nagina lavur pli.
Cun quai ch'il lieu da scola a Cazis croda davent, sto il chantun chattar alternativas per l'instrucziun. Quel surpiglia er ils custs per ils curs d'integraziun. Tge che capita cun il bajetg n'è anc betg cler. Sco ch'i ha num da la vart dal chantun, tschertgian ins ina soluziun per ils scolars. Per las persunas d'instrucziun na possia il chantun dentant betg porscher ina soluziun da cuntinuaziun.