Il temps d'aur dals onns 70 ed 80 a San Bernardino èn daditg passads. Cun il project San Bernardino Swiss Alps da l'impressari ed investur tessinais Stefano Artioli è dentant era turnada la speranza. L'enviern passà ha il territori da skis puspè avert, quai è il motor dal svilup turistic, di Artioli. En il center da la vischnanca vegnan renovads hotels sco era divers restorants per ch'i sajan pronts per la nova stagiun d'enviern. L'atmosfera da nov'entschatta è palpabla en la vischnanca.
La speranza d'ina renaschientscha
En vischnanca regia in'atmosfera da partenza, vuschs criticas raras e la speranza d'in meglier temp grond. Per la terza giada han ils responsabels infurmà la populaziun davart il stadi da las lavurs terminadas e quai che vegn anc. Ina gronda sfida è tenor il president communal, Mattia Ciocco, da porscher avunda lieu d'abitadi per indigens ed en spezial era per il persunal. Stefano Artioli è conscient da la situaziun da mancanza. Perquai stoppian abitaziuns da persunal ussa gia vegnir construidas. Els hajan constatà che la fiera d'abitaziuns saja sitga – da Roveredo enfin Bellinzona.
Stefano Artiolo investescha en in'emprima fasa radund 300 milliuns francs, ha el confermà vers RTR. El saja persvas che San Bernardino daventia ina marca fixa en il turissem. Sco schanza per tut il Grischun vesa era Martin Vincenz, commember dal cussegl d'administraziun da San Bernardino Swiss Alps e directur da Grischun Vacanzas, il project. Cun San Bernardino renaschia in lieu da tradiziun che portia plivalur a l'entir sectur turistic.
