«Sala Capauliana» - Local d'exposiziun permanent per la collecziun Capaul

Fin ussa era la collecziun d'art dals consorts Clara e Duri Capaul zuppada en in tschaler. Ussa èn las ovras che han tuttas in connex cun il chantun Grischun ni èn vegnidas stgaffidas dad artists ed artistas grischunas accessiblas publicamain.

In omagi als fundaturs

L'emprima exposiziun en la «Sala Capauliana» saja in omagi als fundaturs da la fundaziun Capauliana Clara e Duri Capaul, di la curatura e mainafatschenta Noëmi Bechtiger en ses pled d'avertura. Gist a l'entschatta da l'exposiziun as vesa dus purtrets da Robert Cavegn che mussan Clara e Duri Capaul. Vinavant vai cun ovras da Matias Spescha, Not Vital e Corsin Fontana. Er d'admirar datti per exempel ovras da Giovanni, Alberto ed Augusto Giacometti, Alois Carigiet, Giovanni Segantini, Ernst Ludwig Kirchner e Gaudenz Signorell.

Igl saja impurtant, che la collecziun da la fundaziun Capauliana saja uss finalmaing acsessibla publicamain – Art na saja betg qua per esser en tschalers, mobain per mussar.

Avertura da la «Sala Capauliana»

Tscherner n'era betg simpel

En l'emprima exposiziun en la «Sala Capauliana» cun il titel «GRAUBÜNDA. Highlights aus der Fundaziun Capauliana» èn tut en tut exponidas 26 ovras. Da decider, tgeninas ovras dal fundus cun prest 30'000 objects che vegnian finalmain mussadas saja stà tut auter che simpel. Era sch'ella haja precis savì tge ch'ella veglia far saja il process da tscherner las ovras per l'avertura da la «Sala Capauliana» stà ditg, di la curatura. Ella haja fin l'ultim mument anc midà e vess gugent anc mussà almain 10 ovras dapli, ma per quai saja il spazi memia pitschen. Uschia ch'ella n'excluda betg ch'i dettia forsa ina segunda u er ina terza part da l'exposiziun dals highlights da la fundaziun Capauliana. Il fundus saja en mintga cas avant maun.

Or da l'archiv
Cuntrasts dal 2003 davart la collecziun Capaul