RTR Live - Cult divin ecumenic a Samedan

Set lieus da la Dieta da las Trais Lias en tut las regiuns – festas per la populaziun

Ils 12 da mars ha cumenzà il program cun la preschentaziun dals protocols da la Dieta da las Trais Lias e dals protocols statals. Las Dietas da las Trais Lias èn in element impurtant da las festivitads per il giubileum da 500 onns. Sin las Dietas da las Trais Lias devi discussiuns animadas ed i vegnivan prendidas decisiuns. Ellas servivan sco lieu per sa barattar e per sviluppar vinavant las Trais Lias. L'onn 2024 laschan set lieus reviver lur Dietas da las Trais Lias. Ultra dals lieus tradiziunals da la Dieta da las Trais Lias Cuira, Tavau e Glion porschan dal zercladur fin l'october era Roveredo/San Vittore, Samedan, Poschiavo e Val Müstair divers programs culturals, culinarics, ma er nostalgics e plain discussiuns.

Exposiziun ambulanta «Stgazis grischuns sin viadi»

Dal cumenzament da matg fin la fin d'october è l'exposiziun ambulanta sin viadi tras il chantun cun fermadas en 12 lieus. I sa tracta d'in museum mobil che reflectescha la cultura plain fassettas dal Grischun e che vegn emplenì cun objects persunals da Grischunas e Grischuns. L’exposiziun vegn er emplenida cun «stgazis cun lur istorgias» or da la populaziun. Ina preschentaziun dals stgazis collecziunads en il Museum retic cumplettescha questa turnea.

Vernissascha «Atlas da l'istorgia dal Grischun 1524–2024»

En 50 temas porscha l'atlas ina preschentaziun visuala da l'istorgia dal Grischun e resumescha en moda chapaivla il pli nov stadi da la perscrutaziun. Var 50 perscrutadras e perscrutaders cun expertisa specifica han elavurà ils cuntegns per in vast public.

Edida vegn questa ovra da l'Institut per la perscrutaziun da la cultura grischuna en collavuraziun cun l'Archiv dal stadi dal Grischun. L'atlas è disponibel en tut las linguas chantunalas. La vernissascha ha lieu ils 20 da settember 2024 a las 17.00 en il Teater Cuira.

In teater al liber per la naschientscha dal stadi liber

Il toc raquinta da la discordia tranter las valladas grischunas, da la lutga europeica per la pussanza e da la naschientscha dal Stadi liber da las Trais Lias. L'epoca turbulenta vegn exprimida en in nov, grond teater al liber che Origen realisescha sin la planira auta da Lantsch.

Il mussa il cumbat per pussanza tranter las vischnancas autonomas, l'aristocrazia cun sia influenza enorma ed ils prinzis esters che san co far valair lur interess en il giuven stadi liber. Il teater al liber vegn giugà da mez settember fin mez october.