Las lingias grassas che la dretgira chantunala ha fatg quest onn, porschan tut quai ch'i dovra per in crimi: drama, cumbat, accusaziuns, ed i va per daners.
- Il matg da quest onn survegn in ertavel ina segunda sentenzia pertutgant sia ierta. En l'emprima versiun erta el in mez milliun francs da ses bab, en la nova versiun van quels daners a la figlia da l'advocat. Il derschader Peter Schnyder pretenda, ch'il president da la dretgira Norbert Brunner haja sfalsifitgà il document. Brunner di, el n'haja fatg nagut betg lubì.
- Omadus pretendan in da l'auter, da sa retrair.
- Il zercladur duai la cumissiun da giustia far urden en la dispita. Er ella vegn tar la conclusiun, che Norbert Brunner possia avair sfalsifitgà il document. Relaschar el da l'uffizi saja dentant obsolet cunquai ch'el va en pensiun. L'immunitad da Brunner vegn retratga, la procura publica duai pudair cuntinuar d'intercurir il cas.
- Er Peter Schnyder tschiffa ina charta melna da la cumissiun da giustia dal Cussegl grond. Er el n'haja betg fatg ses duair. Ultra da quai saja el in individualist perquai che tut ils auters derschaders na veglian betg pli lavurar cun el.
- Avust: En il Cussegl grond han lieu las elecziuns dals derschaders. PS, PPS e PBD vulan il pli gugent barattar or tut ils derschaders, perquai ch'er ils auters haja savì da la dispita e na fatg nagut.
- Trais novs candidats vegnan preschentads al Cussegl grond, tuts trais vegnan er elegids.
- Peter Schnyder na dumogna betg la reelecziun.
- Remo Cavegn ch'era deputà en il Cussegl grond da la PCD, daventa il nov president da la dretgira chantunala. Sper el vegnan anc Alexander Moses e Christoph Bergamin elegids.
