La suprastanza da la citad da Cuira vuleva reorganisar ils uffizis da construcziun auta. Il parlament da Cuira ha dentant refusà il messadi da la suprastanza. Quai cun 12 encunter 9 vuschs ed in'abstenziun. La proposta da renviada è vegnida da l'Allianza dal Center. Il motiv principal è ch'i saja il fauss mument per reorganisar uffizis, uschè curt avant las elecziuns communalas il zercladur.
Uffizi dueva midar departament
Tenor giavisch da la suprastanza avess il departament da finanzas duì esser responsabel per la realisaziun da bajetgs en la citad. L'uffizi da construcziun auta avess midà dal departament da bajegiar en quel da finanzas. Plinavant fiss il secretariat da bajegiar daventà in agen uffizi. Il medem era planisà per las partiziuns da planisaziun da la citad e dal spazi liber.
Per la suprastanza da Cuira steva l'optimaziun en il center. Actualmain sajan memia blers departaments involvids tar in project. Tar ina nova chasa da scola saja per exempel il departament da finanzas che surdettia las incaricas, il departament da bajegiar saja responsabel per la planisaziun e realisaziun – e per l'administraziun ha alura l'uffizi da immobiglias la responsabladad. Ina procedura speditiva na saja pia betg pussaivla.
Che tut ils process duessan vegnir mess ensemen en il departament da finanzas ha chaschunà critica. Sco la manadra da la protecziun da la patria dal Grischun, Ludmilla Seifert, ha ditg envers il schurnal regiunal dad SRF, avant la decisiun dal parlament, saja il mument per la reorganisaziun il fauss – las elecziuns a Cuira èn l'entschatta da zercladur.
Cun la midada da l'uffizi da construcziun auta en il departament da finanzas vegniss quel quasi liquidà. Actualmain hajan ins uffizi cun in architect da la citad che planisescha tut quai ch'ha da far cun bajegiar. Tenor Seifert sa midass quai tar ina midada da departament. Era ils aspects culturals da bajegiar na sajan betg resguardads en la reorganisaziun.