Per il project digital «Augment da l'effizienza en la tgira grazia a la gestiun da las incumbensas» ha la Regenza concedì a la Fundaziun Ospital chantunal dal Grischun ina contribuziun da 910 000 francs. Ils custs d'investiziun e da manaschi imputabels dal project importan var 2,82 milliuns francs.
Il project duai accelerar ils process cun ina software adequata ed uschia distgargiar la tgira. En l'avegnir duain las incumbensas pudair vegnir repartidas e coordinadas confurm a las persunas. Tras il nov sistem vegn la persuna ch'è responsabla per la tgira infurmada davart ils basegns individuals da la pazienta u dal pazient. Quai spargna temp, perquai che la persuna responsabla na sto betg pli far il viadi tar la pazienta u il pazient ed enavos.
Contribuziun chantunala per stanzas d'instrucziun ibridas
Era ha la Regenza garantì a la Scola auta spezialisada dal Grischun ina contribuziun d'investiziun da 266’000 francs per endrizzar tschintg stanzas d'instrucziun ibridas. Quellas stanzas permettan a las studentas ed als students da participar a l'instrucziun al lieu en la sala da prelecziun u virtualmain per video d'in lieu extern.
