Bleras cuvertas n'han las chanzlistas ed ils chanzlists betg stuì avrir durant la dumengia da votaziuns. La participaziun munta sur l'entir Grischun a stgars 24%. Dapi il 2013 n'è la participaziun ad ina votaziun chantunala betg stada uschè bassa. Dentant: Dapi lura n'hai era betg dà ina votaziun grischuna ina dumengia senza votaziuns federalas.
Per l'ina sajan las fatschentas strusch stadas dispitaivlas e per l'autra n'haja dà naginas federalas, argumenteschan ils cussegliers guvernativs Peter Peyer sco era Mario Cavigelli.
Las retschertgas dad RTR mussan: Là nua ch'i ha era dà votaziuns communalas è la participaziun pli auta. Quai sa mussa per exempel tar las vischnancas da Castaneda e Poschiavo. Castaneda ha gì la pli auta participaziun cun passa 55%. Sper la fatschenta chantunala ha la vischnanca anc gì elecziuns communalas. Era la vischnanca da Poschiavo ha gì in'auta participaziun cun passa 50%. Là hai dà elecziuns communalas ed ina decisiun davart in credit dad 1,6 milliuns per in parcadi ed ina fermada d'auto da posta.
Ulteriurs exempels èn las vischnancas da Lostallo, San Murezzan, Vaz, Mesocco e Domat che han gì fatschentas communalas u elecziuns communalas e mintgamai cun sur 40% participaziun ina pli auta quota en cumparegliaziun cun las ulteriuras vischnancas.
Regenza è cuntenta
Cun radund 84% è vegnì detg Gea a la refurma da giustia sco tala e 70% han ditg Gea ad in credit per realisar la nova sedia per la Dretgira superiura. Pia in cler sustegn dal suveran per las duas fatschentas. Il minister da giustia Peter Peyer sa mussa cuntent cun il resultat.
Jau sun fitg cuntent. In sustegn da rodund 84% per in project da votaziun na datti betg uschè savens. Quai è in mussament per la fidanza en las instituziuns.
Per sfegliar
Quant auta era la participaziun en Vossa vischnanca? Ina survista da las participaziuns tenor vischnancas chattais Vus qua. Las procentualas èn la media dad omaduas fatschentas chantunalas: