La cumissiun da giustia dal Cussegl grond vegn a la conclusiun che Norbert Brunner duai avair malduvrà ses uffizi sco derschader e sfalsifitgà in document d'ierta. Norbert Brunner na lascha dentant betg valair las reproschas.
El defenda sia posiziun uschia ch'el haja simplamain mess en urden la sentenzia. Schebain Norbert Brunner ha sfalsifitgà la sentenzia u betg vegn il mument er intercurì en ina procedura penala da la procura publica. Il Cussegl grond ha en quest connex da decider, sche l'immunitad da Brunner vegn abolida. Lura fiss la via libra per la procura publica d'investigar en connex cun las duas sentenzias.
Ultra da quai crititgescha Norbert Brunner la lavur da la cumissiun. Quella n'avessi betg dastgà sa maschadar en la giurisdicziun, uschia stettia scrit uschebain en la Constituziun federala sco er en la Constituziun chantunala.
Lavur da la cumissiun sin glatsch
Norbert Brunner ha vinavant er franà la lavur da la cumissiun da giustia dal Cussegl grond. Cunquai che la cumissiun n'haja betg interrogà el avant far il protocol, haja ella gì pregiudizis. Brunner pretenda perquai recusaziun da l'entira cumissiun. Il Cussegl grond decida en la sessiun da zercladur, schebain la cumissiun po elavurar enavant il cas u betg.
Er la procura publica n'è anc betg a fin cun la lavur, cunter Norbert Brunner è anc pendent ina procedura penala che duai sclerir, schebain el ha propi malduvrà ses uffizi e sfalsifitgà il document u betg.
