Rapports, vopnas e fotografias - Nova spierta da l'Archiv dal stadi Grischun

La nova spierta da l'Archiv dal stadi è en il medem mument er ina contribuziun per il giubileum da 100 onns da l'Associaziun da las archivarias e dals archivaris svizzers. Ils custs da la digitalisaziun dals emprims dapli che 20'000 object èn plirs 10'000 francs. Perquai vegn la digitalisaziun da tut il material anc a durar decennis.

La nova purschida online pon ins categorisar en trais spartas:

Collecziun da vopnas e sigils

La nova collecziun online da las vopnas da famiglia tar l'archiv dal stadi Grischun è la pli gronda ch'i dat. Plinavant datti ina collecziun da sigils che cumplettescha las vopnas. La collecziun da sigils è surtut impurtanta per retschertgas istoricas. Ella gida d'identifitgar persunas che stattan en in connex cun documents u era per verifitgar la genuinadad da documents.

Rapports annuals

Dapi l'onn 1803 scriva la regenza grischuna rapports annuals en furma da texts, cun tabellas, statisticas e graficas per mussar sias activitads. Enfin l'onn 1849 eran quests rapports scrits a maun – e dapi l'onn 1849 vegnan quels squitschads. Ussa ha l'Archiv dal stadi digitalisà ils rapports dal 1849 enfin il 2009 e mess els a disposiziun online.

Maletgs ord l'aria

Da nov èn da vesair var 15'700 maletgs ord l'aria dal Grischun tranter ils onns 1960 ed ils onns 2000. Quests maletgs duvrava la mesiraziun chantunala per exempel per mesirar parcellas, per eruir la cuvrida dal terren ubain era sco plans da survista. Ils maletgs mussan bunamain l'entir chantun cun excepziun da zonas betg abitadas u betg cultivadas.