Da totalmain 1'980 manaschis che retiran pajaments directs eran 381 manaschis en il Grischun pertutgads da reducziuns. Quai correspunda ad ina procentuala da 19%. Il motiv perquai sajan surtut cuntravenziuns cunter perscripziuns. Be en Turgovia han dapli manaschis survegnì pli paucs pajaments directs – numnadamain 23% da las purarias.
Tar 150 dals 381 manaschis pertutgads haja tenor l'uffizi d'agricultura dà reducziuns pli pitschnas da 200 francs. Ulteriurs 150 manaschis hajan gì reducziuns tranter 200 e 1'000 francs, il rest tranter 1'000 e 10'000 francs. Trais manaschis hajan survegnì reducziuns da passa 10'000 francs.
Ina reducziun da 200 francs survegnan ins oravant tut sch'ins ha manchentà in termin u sch'ins n'ha betg emplenì dal tut in document.
Sco che l'uffizi d'agricultura punctuescha, saja il dumber dals manaschis pertutgads da reducziuns sco er la summa totala da las reducziuns en il Grischun sa reducì cuntinuadamain durant ils davos onns. Perquai saja il svilup tuttavia da valitar positiv.
Adina pli cumplex
Ina gronda sfida per las puras ed ils purs saja l'administraziun che daventia adina pli cumplexa. Perquai infurmescha l'uffizi mintg'onn en scrit ils purs davart las midadas da las prescripziuns. Al Plantahof pon ils purs plinavant visitar curs davart la tematica e sa barattar tar scuntradas ch'èn vegnidas endrizzadas aposta per quest intent.
La cumplexitad è s'augmentada ils ultims onns en moda extraordinaria.
Sin palancau politic sajan prevesidas simplificaziuns. Fin che quellas vegnan realisadas pudess quai dentant anc durar fin l'onn 2030.