Mesemna saira ha la radunanza communala da Churwalden approvà la revisiun parziala da la planisaziun locala. Quella saja necessaria per remplazzar las pendicularas d'apport (Zubringerbahnen) per Brambrüesch tras ina colliaziun directa da Cuira sin il culm, scriva la vischnanca da Churwalden.
Pe da taglia resta
En pli ha la radunanza approvà 640'000 francs per la renovaziun da la Via da Cartschin a Malix ed il preventiv per il 2023. Quel quinta cun in minus da radund 440'000 francs tar entradas da 15,4 milliuns francs. Il pe da taglia resta tar 90% da la taglia chantunala simpla.
