-
Bild 1 von 4Legenda: Marco Frey maina la partiziun da la puma al Plantahof. Tenor el datti ina buna racolta. RTR -
Bild 2 von 4Legenda: La paira sto anc crescher in zichel. En trais emnas è la racolta. RTR
-
Bild 3 von 4Legenda: La maila penda per gronda part anc en las plantas. Questa racolta entschaiva circa mez settember. RTR
-
Bild 4 von 4Legenda: Intginas sorts da maila èn gia vegnidas racoltadas, per exempel la maila Gravensteiner. RTR
Marco Frey fa quint cun in bun onn da racolta. El maina la partiziun puma al Plantahof a Landquart. La qualitad saja buna quest onn – cun la premissa ch’ins ha duvrà products che protegian la puma, pia squittà. Il Plantahof ha squittà la puma e fa quint cun ina buna racolta. Tenor Marco Frey han las persunas ch'han betg squittà probablamain pli grev da laschar crescher buna puma. Igl è stà umid e bletsch e quai attira bulieus e parasits.
-
Bild 1 von 3Legenda: La vetta alva sur la feglia è ruina, era numnà sfarinussa. Quai è ina malsogna da bulieus ch'è sin intginas plantas quest onn. RTR
-
Bild 2 von 3Legenda: Quest onn han intgins figls era londervi plugls da sang. I vesa ora sco launa alva. RTR
-
Bild 3 von 3Legenda: Sch'ins prenda davent ils plugls da sang pudessi esser ch'i vegn cotschen. Qua n'èsi dentant betg il cas. RTR
Marco Frey numna ils products ch’els squittan era «crema da sulegl per la puma». Per part è quai bio e per part era IP, pia in stgalim sut bio. Tut ils mezs ch’els dovran vegnan controllads strictamain. Enfin uss han els racoltà las tschareschas. Da la fin da matg fin a la fin da fanadur han els racoltà 15 tonnas, quai è dapli che la media dals ultims onns. Las plantas da paira n'èn anc betg racoltadas, la paira ha anc da crescher in zichel. Era la maila vegn per la gronda part racoltada a partir da mez settember. Tar la maila fa Marco Frey era quint cun ina buna racolta. Enfin là sagia el adina puspè la puma.