Per 1% è la racolta ida enavos en il Grischun sin var 370'000 meters cubic. Il Grischun è in dals tschintg chantuns cun la pli gronda racolta da laina.
En l'entira Svizra è la racolta da laina sa reducida il 2023 per 6%. Raschuns èn tenor l'uffizi per exempel las periodas da setgira ed ils stemprads locals ch'han sfurzà da duvrar questa laina. Perquai hajan ils responsabels spustà blers tagls da laina planisads.
In detagl interessant: La cumpart da la laina duvrada per producir energia è sa dublada ils ultims 20 onns. Ils motivs per quest svilup èn multifars. Tranter auter han la crisa d'energia e la guerra en l'Ucraina laschà crescher pli fitg la dumonda per laina d'energia. 30% da la racolta da laina vegn duvrada per energia.
Entradas adina pli bassas
Ils 640 lavuratoris forestals han gì l'onn passà entradas totalas da var 598 milliuns francs, tar expensas da 618 milliuns francs. Surtut ils lavuratoris giu la Bassa, en las Alps e da la vart sid da las Alps han da cumbatter cun deficits. Be en il Jura han ils lavuratoris forestals fatg gudogns.
Adattà al tema
Quest atun cumenzan las lavurs per il nov edifizi da la Scola auta spezialisada dal Grischun. Ina part da la construcziun da lain vegn fabritgada cun laina grischuna. In project d'ina tala dimensiun n'hai anc mai dà en il chantun.
