Per garantir il provediment da sanadad decentral ha la regenza grischuna vulì metter a disposiziun in credit d’impegn da 100 milliuns francs. Suenter la fasa da consultaziun è ussa cler: Nagin ha interess da quels daners ch'avessan stuì vegnir pajads enavos. Peter Peyer, il minister da sanadad ha ditg envers RTR che quai saja atgnamain in bun signal.
Quai mussa ch'ils responsabels en las regiuns èn bain conscients da la situaziun e ch'ins vul schliar sez ils defizits generads.
Ospitals ch'avessan vulì in emprest, avessan stuì suttametter a la regenza in plan da mesiras e preschentar en spezial, co ch'i resulta a curta fin a media vista puspè in resultat da gestiun positiv.
Pussibilitar la transfurmaziun a centers da sanadad
Pervia da l'ambient problematic, ils svilups pretensius e las relaziuns finanzialas difficilas duain las regiuns da provediment da la sanadad plinavant survegnir la pussaivladad da transfurmar lur ospitals – en cas da basegn – en centers da sanadad. Quai vul dir che mo pli prestaziuns ambulantas pudessan vegnir furnidas en l'avegnir en l'ospital actual, senza ina purschida staziunara cun custs d'infrastructura e da persunal respectiv. Uschia duess ussa vegnir introducida ina regulaziun che duai simplifitgar las decisiuns da las regiuns da sanadad, sch'i sa tracta da dumondas organisatoricas. Relevanta duai mintgamai esser ina decisiun da maioritad da las votantas e dals votants da las vischnancas d'ina regiun da provediment da la sanadad respectiva.
La survista dal di cun las pli impurtantas novitads per tadlar curt e cumpact.
Per pudair abunar quest podcast duvrais Vus ina software cumpatibla cun podcast u ina app. Sche Vossa app n'è betg en la glista sura, lura pudais copiar la feed URL manual en Vossa app da podcast u software.
La finamira dal project è d'optimar vinavant il provediment decentral da sanadad, per ch'el stettia a disposiziun a la populaziun grischuna er en l'avegnir, senza dentant deliberar las vischnancas da lur responsabladad sco purtadras dals ospitals grischuns. Igl è planisà da metter en vigur la revisiun parziala per il prim da schaner 2026.