La Repower vul expandar en la Mesolcina. Quai rapporta Radiotelevisione della Svizzera italiana RSI. Per cuntanscher quai metta el in'offerta da plirs milliuns francs sin maisa. Quest'offerta duai persvader las vischnancas Mesolcina e Calanca da betg prolungar il contract da provediment cun la «Azienda elettrica ticinese» (AET) – il concurrent tessinais – en dus onns.
Grond interess vi da las ovras idraulicas
Ch'il gigant d'energia Repower cun sedia a Poschiavo è gia uss pront da metter 6 milliuns francs sin maisa per persvader las vischnancas, mussa che la Mesolcina ha ina gronda valur per l'interpresa. Questa regiun è talmain interessanta per la Repower, perquai che bleras concessiuns d'ovras idraulicas scrodan là ils proxims onns.
Ils 6 milliuns francs duain vegnir investids per reducir ils custs d'electricitad da las chasadas en la regiun talian-svizra. Plinavant saja la Repower pronta da fundar ina sociatad en la Mesolcina a quella che las vischnancas pudessan sa participar cun in pachet d'aczias da 30%. Tut quai cumpiglia l'offerta da la Repower.
