La chombra da commerzi grischuna ha envidà interprendiders e represchentantas da l'economia grischuna per in discurs davart la mancanza da persunal. La saira d'infurmaziun ha gì lieu en l'auditori da la Banca Chantunala Grischuna la gievgia saira.
Dumonda e offerta van dapart
Sch'ins discurriva pli baud surtut da mancanza da spezialistas e spezialists, sajan en il futur pertutgads la maioritad dals mastergns. Quai pretenda il forum economic grischun en ses rapport da l'onn 2022. Tenor quel pudessan l'onn 2040 mancar bundant 32'000 lavurantas e lavurants en il chantun.
La problematica generala en Svizra dal pensiunament dals «baby-boomers» (1946-1964) è en il Grischun anc pli severa. Blera glieud giuvna banduna il chantun per ina lunga part da lur vita creschida, e turna pir en la vegliadetgna enavos en il Grischun. La proporziun tranter giuven e vegl daventa uschia anc pli ferm or da l'equiliber en il futur. Entant che la Svizra fa quint cun in augment da la populaziun, quinta il Grischun cun ina diminuziun.
Grischun duai vegnir pli attractiv
Durant la sairada èn vegnidas preschentadas differentas propostas per schliar il problem. I saja impurtant da sviluppar il Grischun sco lieu attractiv per viver e lavurar, per attrair nov persunal d'ordaifer e decimar l'emigraziun en auters chantuns. In'autra varianta saja tenor Brigitte Küng, co-manadra dal Forum economic grischun, da persvader pensiunaris e pensiunarias da restar en il martgà da lavur.
Per far vegnir quai pli attractiv dovria però er il sustegn da la Confederaziun, per adattar la moda sco che quella lavur vegniss taxada. La finamira da la sairada era da render attent sin las sfidas, ma er da porscher speranza e promover il barat tranter ils differents emploiaders.
