La finamira dal project che custa en tut 269'494 francs è da simplifitgar la planisaziun da viadi per ils giasts. Cun ramassar las datas turisticas d'utilisaders po vegnir offert a quels ina experientscha persunalisada. Plinavant duai il project stgaffir ina plivalur per las destinaziuns da turissem en il Grischun.
Per pudair offrir questa experientscha persunalisada vegnan las datas dals utilisaders arcunadas en in profil da giast per l'entira Svizra en moda confurma a la protecziun da datas. Quel vegn offrì d'in purschider extern. Questas datas possian er vegnir duvradas ensemen cun funcziuns da persunalisaziun.
En il project da pilot «Profil da vacanzas Grischun» duain vegnir fatgas en in emprim pass las lavurs preparatoricas las pli impurtantas per pudair examinar e validar il project. Sin basa dals resultats furnibels duai vegnir cuntinuà cun in project da realisaziun. Durant la fasa da pilot da 7 mais collavura Grischun Vacanzas cun experts externs. Ils auters partenaris da project sco las destinaziuns, ils parcs grischuns ed ils furniturs da prestaziuns, vegnan integrads en il decurs da las ulteriuras lavurs da project.
