Patrick Degiacomi, Simon Gredig e Hans-Martin Meuli.
La nova suprastanza da la chapitala grischuna: betg pli part da questa fa Sandra Maissen da l'Allianza dal Center. Era ella avant quatter onns anc vegnida elegida piz-a-cup avant Anita Mazzetta, n'hai questa giada cleramain betg tanschì. Passa 1'300 vuschs han mancà.
Ina schleppa ed ina surpraisa.
E tuttina: propi dal tut surprendent n'è quest resultat betg. Gia dapi in temp aud'ins adina puspè davos maun zuppà critica envers Sandra Maissen. Envers ella sco persuna, ses cumportament, dentant era envers sia lavur. E lezza critica è era vegnida uffiziala. Avant in'emna ha la cumissiun da gestiun da la citad communitgà che duas fatschentas en il departament da Sandra Maissen na sajan betg idas tenor las prescripziuns. E ch'i regia in clima da disfidanza entaifer la suprastanza. A la fin dal di: tissi per ina reelecziun.
Era Patrik Degiacomi è adina puspè stà en la critica. Quai cunzunt en connex cun las discussiuns enturn la stanza da consum e la problematica da drogas a Cuira. Questa critica n'ha dentant betg impedì ina reelecziun dal socialdemocrat. E tuttina: la finamira da daventar sco emprim politicher da la PS president da Cuira n'è – almain per il mument – anc betg reussida. Era sch'el vala vinavant sco favurit, propi cuntent na po el betg esser.
Festivar dastga perencunter Hans Martin Meuli. A moda suverana ha el dumagnà il pass en suprastanza ed ha cunquai defendì il sez dals liberaldemocrats.
Il grond victur è dentant Simon Gredig. Ad el è reussì il segund meglier resultat da tut ils candidats – e cunquai il return da la Glista libra verda en suprastanza e la maioritad sanestra a la testa da la chapitala grischuna.
Samuel Sossai
Producent radio
