En l'entira Svizra ha lieu dals 17 fin ils 23 da mars l'emna d'acziun cunter rassissem. En divers chantuns gia dapi plirs onns. En il Grischun ha l'occurrenza premiera. L'occurrenza che vegn realisada dal post spezialisà per l'integraziun dal Grischun en collavuraziun cun organisaziuns, cun la populaziun e cun il sustegn da la citad da Cuira.
Quest tema n'è betg stà en il center enfin ussa – ed er ina decisiun politica dad installar in post da cussegliaziun encunter rassissem è vegnida prendida relativamain tard qua.
Per l'emna d'acziun èn planisadas 22 differentas occurrenzas che vegnan repartidas sur ils set dis. In'occurrenza vegn ad avair lieu a Tavau, il rest a Cuira. Uschia pon ins per exempel leger en il Teater Cuira in cudesch davart la tematica «rassissem» ensemen cun auters participants , durant ina saira datti ina discoteca per giuvenils cun musica da l'entir mund, en il Kulturpunkt a Cuira pon ins purtar tratgas or da la patria per in brunch cuminaivel, uschia ch'ins po giudair ensemen in buffet internaziunal.
Cun l'emna d'acziun vulain nus sensibilisar la vasta publicitad e stgaffir lieus, nua ch'ins po discurrer davart la tematica; saja quai sco victima u era sco persuna dal fatg.
Las occurrenzas han bain lieu quasi exclusivamain a Cuira. L'emna d'acziun cunter il rassissem duai dentant vegnir realisada en l'avegnir mintg'onn - e quai repartì en plirs differents lieus dal chantun.
Tut l'onn qua per cas da rassissem: Post da cussegliaziun encunter rassissem
Il post da cussegliaziun è affilià al post spezialisà per l'integraziun e porscha a victimas da rassissem e da discriminaziun sco er a lur confamigliaras ed a lur confamigliars cussegl e consultaziun. En in emprim pass sa tracti tenor Felix Birchler, manader dal post spezialisà per l'integraziun Grischun, d'analisar la situaziun cun la persuna che sa senta pertutgada da rassissem.
En in proxim pass vegn elavurà, tge che la persuna dovra e co ch'ella pudess tut tenor sa defender. Savens na pon ils cas betg vegnir limitads mo sin rassissem, mabain giajan savens er per il dretg da lavur u er per il dretg da locaziun.
Sco exempel numna Felix Birchler in cas, nua ch'ins ha disditg la lavur ad insatgi pervia da sia appartegnientscha religiusa. Suenter che la persuna ha preschentà quai en moda credibla a la cussegliadra, na vegn la patruna u il patrun en ils plirs cas betg a confermar quai, mabain a dir che la raschun saja stada sulettamain la prestaziun da lavur. Uschia vegni examinà, sch'i po vegnir cumprovà che la prestaziun n'era effectivamain betg pli suffizienta u sch'igl exista tuttina in motiv discriminant davosvart. Il resultat da questas acziuns ed examinaziuns dependa fitg da la situaziun. Sche la plazza è gia vegnida disditga a la persuna, lura sa tracti plitost d'ina satisfacziun posteriura. Sche la relaziun da lavur vala anc adina, vai plitost per chattar in'autra moda e maniera da communicaziun tranter il patrun ed il lavurant.
En tscherts cas pon ins mussar al patrun, co ch'el po evitar ch'in collavuratur sa senta taxà sco negativ pervia da sia derivanza.
Sper tals cas che vegnan per part accumpagnads sur pli lung temp, datti era cas u dumondas che pon vegnir scleridas fitg svelt, nua ch'i tanscha per exempel in'ura da tadlar per raquintar si'istorgia. In'ulteriura incumbensa fitg impurtanta dal post saja plinavant er d'infurmar la glieud. co sa cumportar, sch'ella daventa perditga d'in cas rassistic.
Tenor Felix Birchler datti qua en sasez dus proceders pussaivels. Per l'ina possian ins sa metter sco protectura per la victima e dir a quella explicitamain ch'ins haja percepì l'ingiustia e saja da sia vart. In'autra pussaivladad è da confruntar directamain il delinquent. Quai dovra dentant fitg bler curaschi e n'è betg adattà per mintgin sco reacziun.