Per sia scolaziun d'emprendists survegn la Ems-Chemie il premi da furmaziun naziunal 2019 da la fundaziun Hans Huber e da la fundaziun FH Svizra – duas fundaziuns che promovan la furmaziun duala. Il premi è dotà cun 20'000 francs e vegn surdà ils 12 da november a Bienna. Ils davos 2 onns han la Banca UBS ed il constructur d'aviuns Pilatus survegnì questa distincziun.
La Ems-Chemie scoleschia mintg'onn radund 40 novs emprendists en 15 professiuns e contribueschia uschia al progress da l'entira regiun, hai num en l'argumentaziun. En il cader superiur da l'Ems-Chemie lavurian actualmain plirs anteriurs emprendists.
Premi naziunal da furmaziun
Avrir la boxSerrar la box
Il Premi naziunal da furmaziun da las fundaziuns Hans Huber ed FH Svizra onurescha mintga onn ina interpresa che s'engascha spezialmain per la furmaziun da professiun duala. Il premi renconuscha la furmaziun e scolaziun supplementara dals collavuraturs da l'interpresa. Ils ultims onns han las suandantas firmas survegnì il premi:
2018: UBS
2017: Pilatus Flugzeugwerke AG
2016: AMAG
2015: Stadler Rail
2014: Swatch Group AG
2013: Coop
Ord l'archiv:
La EMS-Chemie s'engascha gia baud per recrutar emprendists, per exempel sco qua en il video al di dal futur 2016.
