Las frequenzas en ils trens sajan 80-90% pli bassas che normal, uschia descriva Simon Rageth la situaziun actuala tar la Viafier retica. Las consequenzas sajan d'ina vart ina reducziun da la purschida e da l'autra vart l'introducziun da lavur curta a partir dal prim d'avrigl. La lavur curta pertutgia tut ils radund 1'500 collavuraturs. Influenza sin las pajas haja questa mesira enfin uss betg – la paja restia tar 100%.
La crisa ha grond'influenza sin la fatschenta.
Nagins conducturs en ils trens
Tranter auter desistia la Viafier Retica da persunas d'accumpagnament en ils trens, uschia Rageth. Las davosas emnas sajan conducturas e conducturs bain stads en ils trens ma n'hajan betg pli fatg controllas. Cun l'introducziun da lavur curta hajan els decis da desister dal tut da conducturas e conducturs.
Tge consequenzas che la crisa da corona haja sin la fatschenta en general na sappian ins uss anc betg dir.
