Las pendicularas grischunas han er il fanadur nudà dapli giasts. Cumpareglià cun il fanadur da l'onn avant è il dumber creschì per 3%. La svieuta è 12% pli auta. Quai resulta dal nov monitoring da las pendicularas svizras.
En media dals davos tschintg onns han las pendicularas grischunas registrà questa stad 37% dapli svieuta - quai è sur la media svizra da 20%.
Autras regiuns han gì anc dapli giasts
Cumpareglià cun autras regiuns tutga il Grischun però tar quellas cun in dals pli pitschens augments da giasts. En media han las pendicularas svizras numnadamain nudà in plus da 40%. Il Grischun aveva però gia l'onn passà registrà in augment cunquai ch'il chantun n'era betg stà pertutgà uschè ferm da la schlett'aura da la stad sco autras regiuns.
Cunzunt la Svizra Centrala ha registrà in grond augment da 86% dapli giasts. Per l'ina saja quai pervia da la meglier'aura quest onn e per l'autra sajan puspè dapli giasts internaziunals vegnì ch'anc la stad 2021.
