Pendicularas Cuira/Term Bel - La nova pendiculara da Brambrüesch vegn probabel a sa retardar

Il project da la nova pendiculara da Brambrüesch vegn probabel a sa retardar. Il parlament da la citad da Cuira ha numnadamain decidì d'examinar pli en detagl ils custs da las novas pendicularas. Avant intgins dis avevan las Pendicularas Cuira/Term Bel annunzià ch'il project vegni a custar 35 milliuns francs - 4,5 milliuns dapli che quintà.

Il parlament da la citad da Cuira ha decis cun 17 tar ina cuntravusch ed in'abstenziun ch'i duaja dar in rapport ch'examinescha pli en detagl ils custs per il project da la pendiculara da Brambrüesch. I na saja betg cler, quant che l'entir project vegnia a custar. Concret: Sch'ins na stoppia la finala betg be quintar cun custs da 35 milliuns, mabain cun 40 milliuns francs, ha Urs Marti ditg a la sesida dal parlament. Tenor plan duaja la nova pendiculara esser en funcziun davent da la stagiun d'enviern 2026/27. Pervia da quellas examinaziuns che vegnan fatgas uss, saja dentant pussaivel che l'entir project sa retardeschia per in onn.

Nova pendiculara da Cuira vegn pli chara

Oriundamain han ins quintà cun custs totals da radund 24,4 milliuns francs +/- 25%. Quai dat ina summa maximala da 30,5 milliuns francs. Questa reserva da 25% saja gia duvrada si, ha ditg Reto Küng dal cussegl d'administraziun da las Pendicularas Cuira/Term Bel envers RTR. Per l'ina saja la pendiculara sezza vegnida pli chara e per l'autra sajan las staziuns vegnidas planisadas en in auter lieu.

Avant quatter onns n'avevan las pendicularas era anc betg quintà cun la chareschia da 15,1% dals custs da construcziun pervia da la pandemia e la guerra en l'Ucraina. Quests custs da 4,5 milliuns francs vegnissan uss anc vitiers. Quai communitgeschan las pendicularas da Cuira/Term Bel.

Pievel duai votar davart ils custs pli auts

Las pendicularas da Cuira appelleschan al parlament da la citad da Cuira da pussibilitar uschè spert sco pussibel ina votaziun communala. En quella duess la populaziun decider davart l'import manchent da 4,5 milliuns francs. Sch'i va tenor il giavisch da las pendicularas duess il parlament tractar la dumonda tar la proxima sesida ch'ha lieu ils 5 da settember.

Tge schabegia sch'il pievel di Na?

Sche quests custs pli auts vegnissan refusads dal pievel, lura stoppian ins anc ina giada far in nov project che vegniss lura probabel anc ina giada davant il pievel, ha ditg Reto Küng envers RTR. In plan concret per quest scenari na dettia il mument anc betg. Segir saja dentant ch'il project vegnia a sa retardar e ch'i vegni a dar custs supplementars per las midadas.

La fin dal mais vegnan las pendicularas ad inoltrar la planisaziun actuala a l'Uffizi federal da traffic per l'examinaziun preliminara. Definitiv vulan las pendicularas lura inoltrar la dumonda per il project sin la fin d'october quest onn. Quest uffizi controllescha il project e la planisaziun. Sche tut va tenor plan, duess la construcziun da la nova pendiculara cumenzar il 2025. Uschia che quella è lura sin la stagiun d'enviern 2026/2027 a fin.

Pertge remplazzar las pendicularas?

Per l'ina possian osps cuntanscher pli svelt Brambrüesch, per l'autra vulan ins s'adattar als novs basegns dals osps e stgaffir plazs per charrotschas e velos. Cuira aveva il 2019 approvà cun 55% a quella nova purschida. Per bajegiar la nova staziun a Cuira sto la Stadthalle plinavant far midada.

Midada al timun dal project

Ils 30 da zercladur han las pendicularas inoltrà tar l'Uffizi federal per traffic la dumonda per l'approvaziun dal plan. Cun quai saja il project uss pront, scriva l'interpresa en ina communicaziun. Uschia saja er la lavur da Reto Künd sco mainaproject a la fin. El ha remess ses uffizis sco delegà, sco commember dal cussegl administrativ e sco responsabel per il project per la nova pendiculara Brambrüesch. El remettia ses uffizi sin agen giavisch, hai gì num. Uss surpiglia Peter Engler quest post perquai che la communicaziun cun la citad haja uss prioritad.