En ils ospitals grischuns sa chattan il mument otg pazientas e pazients da corona. Quatter da quellas èn ospitalisadas a Cuira, da quellas sa chattan duas sin la staziun intensiva. Trais ulteriuras persunas vegnan tractadas en l'ospital a Samedan ed ina persuna en l'ospital a Glion.
Plaz per prest 100 pazients da corona en l'ospital chantunal
L'ospital chantunal a Cuira è cunquai anc lunsch davent da sias capacitads. Sco quai ch'il pledader da medias Dajan Roman ha ditg sin dumonda dad RTR, avess l'ospital capacitads da tractar prest 100 persunas cun isolar e sustegnair da trair flad.
Er a Samedan n'èn ins actualmain betg als cunfins e tenor il directur Beat Moll n'è quai er betg da far quint las proximas emnas. Sumeglianta è la situaziun en ils ulteriurs ospitals regiunals dumandads. A Savognin, Glion e Tavau èn ins fin ussa betg vegnì en las stretgas pervia d'ospitalisaziuns da pazients da corona.
