In brav sigl èsi. En sia emprima legislatura recaltga Roman Hug da la PPS gia in post impurtant: il vicepresidi en la cumissiun da scienza, educaziun e cultura. Il noviz en il Cussegl naziunal po quintar da vegnir en dus onns anc in stgalim plinensi. Ils vicepresidents survegnan per ils solit suenter dus onns il presidi d’ina cumissiun.
Mintga dus onns vegnan repartids ils posts da cumissiun tenor la fermezza da las partidas. Magari datti rizraz tgi che dastga ir en las cumissiuns pli desideradas. Dapi gievgia passada èsi cler, tgi che prenda nua influenza en las differentas cumissiuns da las duas chombras federalas.
Auters onns avevan las parlamentarias ed ils parlamentaris grischuns mintgamai occupà plirs presidis u vicepresidis da cumissiun. Questa giada è quai reussì be a Roman Hug.
Dunnas en cumissiuns pussantas
Magdalena Martullo da la PPS ed Anna Giacometti da la PLD sesan omaduas en cumissiuns da gronda influenza. Gia en l’ultima legislatura è Giacometti s’etablida sco politicra da finanzas. Era uss survegn ella puspè in sez en la gronda cumissiun da finanzas ed en la sutcumissiun che prenda sut la marella las finanzas da l’armada, da la polizia e da la giustia.
Gugent avess la cussegliera naziunala da la Bregaglia era surpiglià in vicepresidi u presidi en la cumissiun da finanzas. Ma damai che la PLD ha pers forza en las elecziuns naziunalas, na po la partida era betg pli occupar tants presidis. Malgrà sia experientscha na po Anna Giacometti pia betg presidiar la cumissiun.
La cumissiun per economia e taxas para dad esser la preferida dad Magdalena Martullo. Gia en las ultimas duas legislaturas ha la cussegliera naziunala politisà en quella. Uss po ella vinavant trair ils fils en la cumissiun che tracta dumondas d’economia, d’agricultura, da taglias, da bancas e dal martgà da lavur.
Pult e Candinas s'occupan dal traffic
Gist dus Grischuns – Jon Pult da la PS e Martin Candinas da la AdC – sesan en la cumissiun da traffic e telecommunicaziun. Ils dus cussegliers naziunals eran gia avant en questas cumissiuns.
Martin Candinas è plinavant en la cumissiun da segirezza. Jon Pult è en la cumissiun per ambient, planisaziun ed energia che metta fil en guila per pliras dumondas ch’èn d’impurtanza per il Grischun.
Mintga chombra parlamentara ha sias atgnas cumissiuns, ma tematicamain èsi las medemas, uschènumnadas «Schwesterkommissionen». Damai ch’il Cussegl dals chantuns ha mo 46 commembers, survegnan lezs adina dapli sezs en lur cumissiuns.
Stefan Engler da l’AdC sesa en trais cumissiuns. Per l’ina èsi las medemas sco Jon Pult en il Cussegl naziunal. Plinavant è Engler anc en la cumissiun da las instituziuns politicas, nua ch’i va tranter auter era per il dretg d’asil.
Martin Schmid pitga il record
Martin Schmid da la PLD pitga il record en la delegaziun grischuna. En quatter cumissiuns po il cusseglier dals chantuns prender influenza: la cumissiuns d’ambient, planisaziun ed energia, la cumissiun d’economia e taxas, la cumissiun da segirezza e la cumissiun da grazia.
En pli tgira il parlament contacts cun parlaments en l’exteriur. Martin Schmid ed Anna Giacometti èn per exempel en la delegaziun per relaziuns cun il parlament talian. Schmid è era delegà per il parlament austriac. Martin Candinas è delegà tar la OSCE, l’organisaziun per segirezza e collavuraziun en l’Europa.