A la chatscha dal Cussegl federal
Er per schurnalistas e schurnalists è il WEF in lieu tut spezial. Uschia er per Silvana Degonda che lavura per la «Schweizer Illustrierte». Ella ha durant quest WEF tranter auter er gì inscunters cun cusseglieras e cussegliers federals.
Jau hai vulì savair da Karin Keller-Sutter tge che tut quels discurs al WEF, per exempel cun Ursula von der Leyen u Wolodimir Selenski, portan.
La schurnalista oriunda da la Surselva ha vulì savair tge ch'il Cussegl federal fa insumma durant il WEF e tge inscunters che cusseglieras e cussegliers federals han ed er pertge. Chattà or ha ella ch'ils inscunters èn fitg impurtants era sch'igl è «mo» per emprender d'enconuscher in l'auter persunalmain per lura suenter avair ina basa per ulteriurs contacts.
La fotografia da la blutta roiala
Sco fotograf al WEF vegn Mattias Nutt adina puspè datiers als promis – magari schizunt als roials. Dapi onns è el fotograf uffizial per il WEF ed ha gia gì avant la camera scheffas da stadi, acturs ed auters stars. El emprovia adina da far la meglier pussaivla fotografia. Adina na gartegia quai betg – sco per exempel tar Prinzi William da la gronda Britannia.
Ils spots han glischà directamain sin ses chau – uschia ch'el glischava bler memia fitg.
Cunquai ch'el haja be gì paucas secundas temp n'haja el betg pudì plazzar auter il prinzi, uschia che las glischs han glischà directamain sin la blutta da Prinzi William. In curt inscunter malgartegià, tut auter che l'inscunter cun cusseglier naziunal Islam Alijaj che sesa en sutga cun rodas. El haja pudì far fitg bellas fotografias dad el, da sia vart da tschigulatta ch'è dal reminent la sanestra, ed haja silsuenter anc gì in fitg bun discurs cun el.
Dubis da segirtad e sch'il WEF resta a Tavau
Il cusseglier dals chantuns Martin Schmid va dapi onns al WEF. Entant ch'el è oz là sco represchentant dal parlament svizzer era el avant onns al lieu sco cusseglier guvernativ. Cun manar il departament da segirtad ha el adina puspè gì contact cun il fundatur dal WEF Klaus Schwab. Dentant era cun cussegliers federals che vulevan avair la garanzia che tut funcziuna.
Il cusseglier federal Samuel Schmid m'ha telefonà e vuleva savair sche nus pudain garantir la segirtad.
Puncto segirtad han ins numnadamain fatg adattaziuns da quel temp. Era han ins pudì persvader il WEF da restar a Tavau. Teamwork dal Grischun e da la Confederaziun han pudì garantir quai, di Martin Schmid.
In salid da la dunna
Tgi avess pensà ch'jau inscuntrel propi el.
Sch’in actur enconuschent vegn al WEF, lura vulan tuts vesair quel. L'onn 2023 è l'actur englais Idris Elba vegnì onurà al WEF. La dunna dal directur da Grischun vacanzas, Martin Vincenz, ha vis quai e ditg ad el ch'el stoppia drizzar ora in salid. E propi ha Martin Vincenz vis Idris Elba e perfin pudì dar il maun. In salid ha el drizzà ora. Dentant el sez n'enconuscheva betg l'actur.
Festa cun Leonardo Di Caprio
En la «Piano Bar» da l'Hotel Europe amez la promenada da Tavau gira ina massa durant il WEF. Cunzunt las notgs èn selvadias e scheffas da stadi, acturs, roials ed autras persunas pli u main prominentas èn da chattar en la «Piano Bar». Uschia che la possessura dal hotel Jessica Schmid sa regorda d'inquala situaziun speziala.
Tuttenina vegn Leonardo Di Caprio e chanta simplamain cun noss pianist. Quai èn chaussas che nus chattain legher – el ha dentant er fatg bain quai.
Er d'in inscunter cun Bill Clinton e cun in giast roial avant blers onns sa regorda ella anc fitg bain. Ella haia stuì servir ina gervosa ad in um e pensà che qual guardia or sco il prinzi dal Danemarc e lura haja ses um ditg che quai saja er quel.
Il prinzi dal Danemarc vuleva simplamain baiver ina gervosa.
Cura ch'il microfon era gia serrà ha Jessica Schmid er anc raquintà d'in inscunter tut spezial che ses um haja gì cun l'actur american Will Smith. Quel era cun ses figl en l'ascensur da l'hotel e na leva betg laschar vegnir en ses um – pia il possessur da l'hotel – en l'ascensur. Quel haja lura ditg: «Quai è mes ascensur – segir ch'jau poss duvrar quel!». I saja lura la finala stada ina situaziun fitg legra e tuts hajan pudì rir surlonder.
