In tal program da correctura po promover la lingua: tgi che lascha curreger ses text, haja pli pauc retegnientschas da scriver sutsilvan, scriva la Lia Rumantscha. Per quai è er planisà da promover in program da correctura per tut ils idioms e per il rumantsch grischun. Per il surmiran datti gia in tal program.
Il program da correctura funcziuna tenor la Lia Rumantscha per macOS, Mozilla Firefox, LibreOffice, Mozilla Thunderbird, Adobe InDesign ed Microsoft Word. Er en il dicziunari online Pledari Grond duai dar ina fanestra per laschar curreger texts sutsilvans (visualisaziun en la gallaria).
Part d'in program pli vast
Anc quest onn duain ils programs da correctura per il rumantsch grischun, il vallader ed il puter suandar. La versiun sursilvana è prevesida per la stad da l'auter onn. En pli stattan tant la software dal Pledari Grond sco era las datas linguisticas elavuradas da la Lia Rumantscha a disposiziun sut ina licenza libra.
Per evitar ch'i vegn però creà novas bancas da datas che ston vegnir tgiradas separadamain dovra il project directamain las datas dal Pledari Grond.
