Dis da bellezza cun temperaturas miaivlas – e quai il november. En la Bassa èsi grisch cun brentina ed en ils culms traglischa il sulegl. Quai carmala blera glieud en il Grischun. Uschia era en la Val Surses en il territori da skis da Savognin. Là, en il Berghuus Radons che vegn manà da Fadri Arpagaus è la terrassa plaina cun glieud.
Ils blers èn giasts da la bassa, dentant hai era inqual indigen. Tuttas e tuts vulan il medem: anc giudair ils davos radis chauds da sulegl. Quai è numnadamain la davosa fin d’emna ch'il Berghuus Radons ha avert avant la stagiun d’enviern.
È quai in atun da record?
Per Fadri Arpagaus saja quai anc memia baud da dir sch'i sa tractia d'in atun da record. Però, las davosas emnas èn stadas fitg bunas e quai era grazia a l’aura. Uschia haja dà bleras reservaziuns spontanas.
Jau crai schon che nus avain pudì profitar da l’aura quest onn. Las davosas emnas èn propi stadas magnificas si qua.
Cletg per ils ins e forsa in zic discletg per ils auters. Sco per exempel per las pendicularas da Savognin. Lezzas han deplorablamain betg pudì profitar da la bell’aura da las davosas emnas, cunquai che la stagiun era a fin schon avant. Quai saja propi donn, uschia il directur da las pendicularas da Savognin Christoph Passecker. Era la stad saja stada plitost ordinaria. Il settember ed era las vacanzas d’atun hajan purtà blera plievgia – quai haja smatgà engiu in zic las cifras.
That’s life, quai è noss business e cunquai stuain nus viver. Cler, quai è displaschaivel.
La glieud sin la terrassa dal Berghuus Radons na pari betg da disturbar che la regiun turistica sa chatta gist en la stagiun bassa. Il cuntrari. Il sulegl possian ins era giudair uschia ed il bun saja ch'i haja adina plaz per reservaziuns spontanas.
Entant ch'ils ins giaudan anc l'atun, sa preparan ils auters gia per l'enviern
Insatgi ch’è gia lavurus vid las preparativas per l’enviern è Rico Arpagaus. El è mainafatschenta da la stizun Sport Wasescha. Questa stizun sa chatta en il center da Savognin. El e ses team hajan il mument ils mauns plains da far cun preparar skis, semtgar la rauba da dar a fit ed era da far urden en stizun. Era el sentia ch’i haja il mument blera glieud en il conturn – cunzunt las fins d'emna. Cler, la motivaziun da cumprar ussa ina chautscha da skis – da tala bell’aura – saja forsa anc betg usche gronda tar la clientella. Dentant: El sa legria fitg sin l’enviern – sche quel vegnia lura insacura.
