Sur Tavau han paleontologs chattà fossils dad ina sort da dinosaur ch'era fin ussa nunenconuschenta. L'animal da 50 centimeters viveva avant radund 240 milliuns onns a la costa da l'ocean primar che cuvriva lura grondas parts da la Svizra.
Paleontologas e paleontologs tschertgan gia dapi onns fossils tar la Furcla dal Ducan sin 2'740 meters sur mar. En las stresas da chaltschina han quels ussa chattà sis skelets cumplets dal uschenumnà Prosantosaurus schefffoldi, sco quai ch'igl è vegnì publitgà en il magazin dal fatg «Swiss Journal Of Palaeontology».
Il num da la spezia è en onur da Beat Scheffold, in illustratur scientific, sculptur e tecnicist a l'Institut e museum paleontologic da l'Universitat Turitg. Quai per sias contribuziuns multifaras per perscrutar e visualisar reptils marinais en la perioda da trias.