Il concept da l'app Uber para fitg simpel: ins dovra mo in auto, il permiss d'ir cun auto e l'app sin il telefonin. A Cuira è quai in pau pli cumplitgà, e perquai è era la polizia sa fatschentada cun quai. Roland Hemmi, commandant da la polizia a Cuira manegia, ch'i dat cleras premissas, per esser taxist u taxista a Cuira.
I dovra in examen da taxi ed in permiss da la polizia, per lavurar sco taxist a Cuira, di Roland Hemmi. Era stoppia l'auto esser equipà sco taxi cun in taxometer, e tut quai n'ademplescha Uber betg.
Uber n'ha betg il dretg da porscher ses servetsch sin la plazza da Cuira.
Quest reglament pertutga dentant mo la citad da Cuira sez – quai vul dir che Uber dastga lavurar en tut ils vitgs e tuttas citads vischinas, sco p.ex. Zezras. Sch'insatgi è pia registrà sin Uber en in vitg vischinant, dastgan las persunas tuttina ir a Cuira per persunas e metter là persunas.
Per tuttina pudair profitar da las plazzas da taxi a Cuira, vuless Uber collavurar cun ils taxis da Cuira. Quels n'han dentant betg grond interess da lavurar ensemmen cun Uber.
Quai di era Pamela Plörer, vicescheffa da Taxi Pino a Cuira. Per ella na dettia quai nagin avantatg da collavurar cun la app americana – els na profiteschian betg, e per els saja il contact direct cun ils clients impurtant, quai che manca dal tuttafatg tar Uber.
Uber sez ha scrit envers RTR, ch'els spetgan pli e pli interess da las interpresas da taxi, perquai che la dumonda crescha pli e pli. La furma originala da l'app n'è pia betg pussaivla a Cuira, ma sche l'interess dals taxis vegn propi a crescher, stat anc avert.