Il cusseglier guvernativ Mario Cavigelli daventa la stad 2023 president dal cussegl d'administraziun da la Viafier retica (RhB). Quai è vegnì enconuschent venderdi a la radunanza generala da la RhB. Cavigelli banduna la fin da l'onn la regenza grischuna pervi da limitaziun dal temp d'uffizi e duai lura succeder a Stefan Engler che maina la Retica dapi 11 onns en quest gremi.
Era nov en il cussegl d'administraziun ha la regenza grischuna clamà Cornelia Appetito Isenmann che suonda a Paul Blumenthal che banduna pervi da limita dal temp d'uffizi. Sin proposta dal cussegl d'administraziun è Kurt Baumgartner elegì en il cussegl d'administraziun e suonda a Tarzisius Caviezel che banduna era il gremi per limita dal temp d'uffizi.
Reelegids en il cussegl d'administraziun èn Beatrice Baselgia-Brunner, Martin Bütikofer Renzo Simoni e Vera Stiffler.
La Viafier retica para da sa revegnir da la pandemia – plaunet
Ultra da quai ha la radunanza approvà il rendaquint ed il quint da concern ed il quint annual dal 2021. Il quint ha serrà cun in lev gudogn, suenter il deficit da l'onn da pandemia 2020. Lura aveva la RhB stuì duvrar tut las reservas per evitar il mender, sco quai ch'il president actual Stefan Engler ha ditg al Telesguard (5-4-2022). En mintga cas èn ils responsabels plitost optimistics per l'avegnir per il mument, cunquai che l'onn 2022 ha cumenzà relativ bain.
