Bleras sendas per ir a viagiar en muntogna èn anc cuvridas cun naiv, uschia ch'ins sto anc spetgar cun ir en muntogna. Quai badan era las chamonas dal Club alpin svizzer en il Grischun.
Nus avessan gì l'emna passada 100 visitadras e visitaders. Per raschuns da segirezza avain nus però stuì dir giu a tuttas e tuts.
Ed era la chamona Lischana a Scuol e la chamona Silvretta a Tavau han sentì vid las reservaziuns ch'igl ha anc naiv sin las sendas, e che l'aura n'è betg anc propi uschè da stad. Tar tut las chamonas ch'èn situadas tranter 2200 e 2500 meters sur mar hai anc naiv sin las sendas. En ina emna stuess la naiv dentant esser davent, dian ils guardiachamonas.
Sendas da viandar èn pensadas per il temp senza naiv e glatsch.
Il mainagestiun da l'uniun Sendas Grischunas Stephan Kaufmann declera che sendas n'èn mai serradas per l'enviern. Uschia na decidan els era betg a partir da cura ch'ina senda saja averta. Quai saja la chaussa da mintga viandanta e mintga viandant sez. Sch'ins vul dentant s'infurmar, lura pon ins s'infurmar tar la vischnanca u directamain tar las chamonas.