Il museum da la natira grischun deditgescha quest onn a la vulp l'exposiziun da l'onn. Dals 10 d'avrigl 2025 fin ils 18 da schaner 2026 po vegnir visitada la nova exposiziun speziala «La vulp – adattaziun maisterila», in'atgna producziun dal Museum da la natira dal Grischun.
La vulp è l'animal selvadi il pli derasà en Svizra. Il spazi da viver da las vulps è sin tranter 600 fin 3'000 meters sur mar. Malsognas, traffic e persecuziun tras l'uman decimeschan il dumber da vulps. Dentant po la vulp s'adattar bain a questas difficultads. E co che la vulp fa quai exact, mussa questa exposiziun speziala. Plinavant pon las visitadras e visitaders er emprender davart las malsognas che vegnan messas en connex cun las vulps.
Quai èn per exempel il verm plat da vulp sco era la ravgia da chauns.
-
Bild 1 von 2Legenda: Il pedagog da museum Flurin Camenisch ed il directur Ueli Rehsteiner. RTR -
Bild 2 von 2Legenda: RTR
Il museum da natira dal Grischun deditgescha mintg'onn ad in auter animal in exposiziun speziala. L'onn passà è quai stà il stgilat ed avant dus onns il giat ed il luschart.
Anc fin ils 19 da schaner 2025 vegn ospitada l'exposiziun speziala «evolution happens!» en il Museum da la natira dal Grischun. Il museum vul cun quella exposiziun mussar tge influenza ch'il uman ha en differents aspects da la evoluziun e quai cun exempels or da la medischina, da l'agricultura e da la protecziun da la natira.
Sper las exposiziuns novas cumpletteschan er referats, excursiuns e curs la purschida dal Museum da la natira dal Grischun durant il 2025.
L'onn passà ha il museum dastgà beneventar tontas visitadras e tons visitaders sco aunc mai, di Ueli Rehsteiner il directur dil museum. En tut bunamein 40'000 persunas.
La natira fascinescha simplamain la glieud.