I dat pliras raschuns, pertge ch'ina persuna banduna sia patria: guerras, situaziuns politicas, catastrofas da natira u mancanza da daners. 740 da questas persunas che han bandunà lur terra èn vegnidas en il Grischun ed han dumandà asil l'onn passà.
Tenor Georg Carl, il manader da la partiziun asil e return, survegnan bunamain dus terzs da tut las persunas il dretg d' asil. Tschel terz sto puspè bandunar il pajais. La cussegliaziun per il return sustegna alura questas persunas. Ma la cussegliaziun è averta per tut las persunas da l'exteriur, di Georg Carl.
La finamira da la cussegliaziun per il return è in return a moda uschè digna sco pussaivel – ed er da pudair evitar meds da sforz.
Dapi il cumenzament dal 2025 èn 77 persunas stadas en questa cussegliaziun. La cussegliaziun concreta è differenta da persuna a persuna, di Georg Carl. Quai va dad organisar documents uffizials e medicaments fin al sustegn finanzial.
Mesiras da sforz sajan numnadamain charas e malempernaivlas per tut las persunas involvidas, oravant tut sche uffants èn pertutgads. Ultra dal sustegn per persunas estras giogan ils daners ina rolla. Quai ves'ins per exempel tar las persunas oriundas da pajais sco l'Afganistan u l'Eritrea. Quests pajais n'acceptan betg lur glieud, danor sch'els returnan voluntarmain.
Tar ils pajais che na coopereschan betg è quai l'unic factur ch'ins po anc diriger – ils meds finanzials.
Sch'ins adeschia ils custs d'ina persuna estra en la praschun, alura saja in sustegn finanzial da 3000 francs in toc pli bun martgà. Quant ch'ins spargnia concretamain cun la cussegliaziun, na vegn betg registrà. «Questa cifra n'è betg uschè relevanta», di Georg Carl. Tenor el vala questa lavur la paina, cunzunt perquai ch'el survegn mintgatant resuns da persunas ch'èn sortidas e che han pudì cumenzar ina nova vita. Quai saja per el ina cumprova suffizienta, ch'i valia la paina.