Il num Lampedusa vegn surtut menziunà, sch'i va per il tema migraziun. Questa pitschna insla taliana vala numnadamain sco ina da las portas per migrantas e migrants ch’emprovan da vegnir sur la mar en l'Europa – per il pli en bartgas cumplettamain surchargiadas. Adina puspè sfundran quellas ed uschia perdan las migrantas e migrants a moda e maniera tragica lur vita.
Salvament tras organisaziuns privatas
Per che quai na capita betg, emprovan differentas organisaziuns privatas da chattar quellas bartgas amez la mar e d'uschia salvar las migrantas ed ils migrants. Ina da quellas organisaziuns è «Sea-Watch» da la Germania. Per pudair sustegnair meglier lur bartgas da salvament sin la mar fan els era sgols d’exploraziun. In tal sgol han dus schurnalists rumantschs pudì accumpagnar.
Da pudair filmar in tal sgol d’exploraziun era per nus ina schanza unica
Tschintg mais preparaziun
Simona Caminada ch'è dapi radund dus 2 onns correspundenta per il SRF en l’Italia, ha gì durant ina da sias reportaschas a Lampedusa contact cun l’equipa da «Sea-Watch». Uschia è naschida l’idea d’accumpagnar l’equipa tar in sgol d’exploraziun. Fin che tut ils permiss necessaris e tut ils detagls eran reglads, hai dentant cuzzà tschintg mais.