La Germania ha offert a la cumissiun da l'Uniun europeica da prender si ina part dals migrants da 2 bastiments da salvament en la Mar Mediterrana. Ins saja pront per ina schliaziun europeica e solidarica, ha ditg il minister da l'intern tudestg Horst Seehofer. Vinavant refusa la Germania però la pretensiun da l'Italia ch'il stadi da la societad nautica da la bartga saja responsabla per migrants e fugitivs. Il 2019 haja la Germania enfin uss prendì si 228 persunas sin la fugia.
Italia na vul betg prender si tuts migrants
In bastiment da l'organisaziun d'agid tudestga «Sea-Eye» aveva salvà 65 migrants avant la costa da la Libia. In'auter dad in'organisaziun taliana ha actualmain 54 migrants a bord. La Germania aveva silsuenter survegnì ina brev dal minister da l'intern talian Matteo Salvini. En quella aveva lez fatg squitsch vers la Germania da surpigliar responsabladad. L'Italia na veglia betg esser il sulet «hotspot»da l'Europa.
«Sea-Eye» respecta scumond talian per il mument
Entant ha communitgà l'organisaziun «Sea-Eye» da betg vulair ir en auas talianas. «Per il mument respectain nus il decret da l'Italia», ha ditg Gorden Isler da l'organisaziun. La bunura aveva l'equipa da la bartga survegnì il decret talian da betg ir en auas talianas.
La fin d'emna passada aveva la chapitania Carola Rackete da la «Sea-Watch 3» tudestga salvà 50 persunas e las transportà a l'insla taliana Lampedusa, malgrà scumond.
RR novitads 09:00